23.1 C
Kathmandu
 

राहत सामग्री वितरणमा अनियमितता गरेको भन्दै जिससविरुद्ध प्रदेश सांसदको उजुरी

ओखलढुङ्गा, १९ साउन । जिल्ला समन्वय समिति(जिसस) ओखलढुङ्गाविरुद्ध प्रदेशसभा सदस्य मोहनकुमार खड्काले जिल्ला प्रशासन कार्यालयमा उजुरी दिएका छन्।

प्रदेश १ का अर्थ समितिका सभापतिसमेत रहेका प्रदेशसभा सदस्य खड्काले ओखलढुङ्गा जिल्ला समन्वय समितिका सभापति जयबहादुर श्रेष्ठविरुद्ध राहत सामग्रीमा अनियमितता गरेको भन्दै उजुरी दिएका हुन्। सांसद खड्का नेकपा ओखलढुङ्गाका अध्यक्ष पनि हुन्।

भूकम्पपीडितलाई वितरण गरेर बाँकी रहेको करोडौं मूल्यको राहत सामग्री जिससले मनपरि ढङ्गले वितरण गरेर दुरुपयोग गरेकाले छानबिन गर्न प्रमुख जिल्ला अधिकारीलाई ध्यानाकर्षण गराएको खड्काले बताए।

जिसस प्रमुख श्रेष्ठले आफू आवद्ध दल नेपाली कांग्रेसले जितेका स्थानीय तह र निकटका व्यक्तिलाई मात्रै करोडौंको राहत सामग्री आफूखुसी वितरण गरेको भन्दै छानबिनका लागि उजुरी गरेको नेकपा ओखलढुङ्गाले जनाएको छ। उजुरीमा जिल्लाको विभिन्न ठाँउमा रहेका भण्डारण कक्षबाट त्रिपाल र तारजाली मनोमानी ढङ्गले बाँडिएको विषयमा छानबिन गरी दोषीउपर कारबाहीको माग गरिएको छ।

जिल्ला समन्वय समितिको कार्यालय परिसरमा भण्डारण गरिएको हजारौं थान जाली र करीब ४० टनभन्दा बढी जाली बुन्न बाँकी तार अपारदर्शी ढङगले समितिले बाँडेको सिद्धिचरण नगरपालिकाका प्रमुख मोहनकुमार श्रेष्ठले बताए।

उता जिल्ला समन्वय समितिका सभापति जयबहादुर श्रेष्ठले यो विषय ठूलो भएकाले छोटोमा भनेर नसकिने बताए। ‘म अहिले जिल्ला बाहिर छु, फोेनमा के भन्नु, यसको कथा लामो छ,’ जिसस प्रमुख श्रेष्ठले भने, ‘सदरमुकाम आएपछि नै विस्तृतमा भनौँला।’ रासस

- Advertisement -spot_img

More articles

LEAVE A REPLY

Please enter your comment!
Please enter your name here

भर्खर