काठमाडौं – गृहमन्त्री रामबहादुर थापाले निर्मला पन्तको बलात्कार तथा हत्या जघन्य अपराध भए पनि नयाँ र पहिलो नभएको बताएका छन् । उनले यस्ता घटनालाई पूर्ण रूपमा रोक्न नसकिने भए पनि दोषी पत्ता लगाउन सबै प्रयास जारी राखिएको बताए ।
आर्थिक वर्ष २०७५/७६ को वार्षिक कार्यसम्पादन प्रगति र आगामी कार्यदिशाका विषयमा मंगलबार गृहमन्त्रालयमा आयोजित अन्तक्र्रियामा गृहमन्त्री थापाले बलात्कारका घटनाका दोषीलाई धमाधम कानुनी कारबाहीमा ल्याइएको दाबी गरे ।
‘निर्मला बलात्कार र हत्या जघन्य अपराध हो, तर नयाँ र पहिलो होइन, हिजो पनि हुन्थ्यो, आज पनि छ, भोलि पनि केही समयसम्म रहन्छ, तर दोषी पत्ता लगाएर छोडिन्छ,’ गृहमन्त्री थापाले भने । थापाले निर्मला प्रकरणको अझै पनि विभिन्न आयोगले दिएका प्रतिवेदनका आधारमा अनुसन्धान जारी रहेको र अपराधीलाई कानुनी कठघरामा ल्याइछाड्ने प्रतिबद्धता पनि जनाए ।
उनले निर्मला हत्या प्रकरणलाई केही शक्तिले राजनीतिकरण गर्न खोजेको भन्दै विगतमा समेत यस्ता घटना हुने गरेको आरोप लगाए । ‘गृहले अपराधीलाई बचाउन खोज्यो भनेर केहीले गलत प्रचार गरिरहेका छन्, यो विषयलाई राजनीतीकरण गरिएको छ, हिजोको सरकारका पालामा पनि भएको थियो, विश्वमा यस्ता घटना हुन्छन्, भइरहन्छन् ।’
उनले गृह मन्त्रालय र नेपाल प्रहरीको तथ्यांकनुसार बलात्कारसम्बन्धी घटनाको ९५ प्रतिशत अनुसन्धान सफल भएको समेत दाबी गरे । गृह सचिव प्रेमकुमार राईले निर्मला हत्याको अनुसन्धानमा सुरुमा नै भएको त्रुटीका कारण निष्कर्षमा पुग्न गाह्रो भइरहेको बताए । सो प्रकरणका विषयमा निरन्तर छानबिन तथा अनुसन्धान भइरहेको भन्दै राईले ढिलै भए पनि दोषी पत्ता लाग्ने विश्वास व्यक्त गरे ।
यो समाचार आजको राजधानी दैनिकमा महेश्वर गौतमले लेखेका छन् ।
