भारतीय र पाकिस्तानी सेनाबीच गोली चल्दा दुई वर्षीय बालकसहित चारजनाको मृत्यु

15

काठमाडौं । भारत र पाकिस्तानबीच विवादित क्षेत्र काश्मीरस्थित लाइन अफ कन्ट्रोल (एलओसीमा) गोली हानाहान हुँदा दुई वर्षीय बालसहित चार सर्वसाधारणको मृत्यु भएको छ । सन् २००३ को युद्धविराम सम्झौता उल्लंघन गर्दै आइतबार भारत र पाकिस्तानी सेनाबीच गोली हानाहान हुँदा सर्वसाधारण निशानामा परेका थिए । भारत प्रशासित काश्‍मीरको एलओसीस्थित दुईवटा स्थानीय बसोबास भएको क्षेत्र कुपवारमा पाकिस्तानी सेनाले गरेको फायरिङबाट एक महिला र एक बालकको मृत्यु भएको भारतीय प्रहरीका अधिकारी श्रीराम अम्बारकरले बताएका छन् । उनले अन्य केही घाइते भएको हुनसक्ने समेत बताएका छन् । पाकिस्तानी सेनाले सोमबार जारी गरेको विज्ञप्तिमा भनिएको छ, “एलओसीमा गरिएको युद्धविराम उल्लंघनका क्रममा भारतीय सेनाले बोराह, दुधनायल, राखछिक्री र चिरिकोट क्षेत्रमा निशाना बनाउन खोजेको थियो ।”  “विभेदकारी भारतीय आक्रमणमा परि दुधनायल क्षेत्रमा दुई वर्षीय बालक मुहम्मद हसीबको मृत्यु भएको छ,” विज्ञप्तिमा भनिएको छ, “त्यसैगरी ७२ वर्षीय एक वृद्धसहित अन्य चारजना गम्भीर घाइते भएका छन् ।”  भारत र पाकिस्तानले दुबैले काश्मीरको आधा-आधामा शासन चलाइरहेका छन् । तर, दुबै मुलुकले सिंगो आफ्नो हुनुपर्ने दाबी गरिरहेका छन् । सन् १९४७ यता उनीहरुबीच काश्मीर क्षेत्रका लागि दुई पटक युद्ध भइसकेको छ । –अलजजिरा