काठमाडौं, १७ मंसिर । प्रधानन्यायाधीशको सिफारिस गर्नका लागि आज बसेको संवैधानिक परिषदको बैठक बिना निष्कर्ष टुंगिएको छ । प्रधानमन्त्री तथा मन्त्रिपरिषद्को कार्यालय सिंहदरबारमा बसेको बैठकमा विभिन्न आयोगहरुका अध्यक्ष तथा सदस्यहरुको नियुक्तिका विषयमा छलफल हुने विषयसूची राखिएको थियो ।
बैठकले नयाँ प्रधानन्यायाधीशको नाम सिफारिस गर्ने बताइएको थियो । त्यसका लागि न्याय परिषदले केही दिनअघि नै सर्वोच्च अदालतका वरिष्ठ न्यायाधीशद्वय चोलेन्द्र शमशेर जबरा र दीपकराज जोशीको नाम सिफारिस गरेको थियो ।
अहिलेका प्रधानन्यायाधीश ओमप्रकाश मिश्र पुस १७ बाट अवकाश हुँदै हुनुहुन्छ । अवकाश हुनुभन्दा एक महिना पहिले नै भावी प्रधानन्यायाधीशको सिफारिस गर्नुपर्ने संवैधानिक व्यवस्था छ ।
