काठमाडौं, १८ भदौ परराष्ट्रमन्त्री आरजु राणा देउवाले भारत भ्रमणका क्रममा हवाई रुटका बारेमा सकारात्मक छलफल भएको बताउनुभएको छ ।
सिंहदरबारमा मंगलबार बसेको प्रतिनिधिसभा अन्तर्गतको अन्तर्राष्ट्रिय सम्बन्ध र पर्यटन समिति बैठकमा आफ्नो भारत भ्रमणका बारेमा जानकारी गराउदै उहाले भारतसंग हवाइ रुटको बारेमा कुरा राखेको र टेक्निकल टिमको मिटिङ गर्ने सहमति भएको जानकारी दिनुभएको हो । भैरहवा र महेन्द्रनगर हवाई रुटका बिषयमा आफुले भारतसंग कुरा गरेको उहाले बताउनुभयो । त्यस्तै उहाले पन्चेश्वरको बारेमा सहमति लगभग अन्तिम चरणमा पुगेको र अन्तिम चरणमा अघि बढाउने कुरा भएको जानकारी दिनुभयो ।
इपीजी बिषयमा भने कुनै छलफल नभएको भन्दै उहाले उपयुक्त समयमा छलफल गर्ने उल्लेख गर्नुभयो ।
त्यस्तै भारत भ्रमणका क्रममा भारतीय प्रधानमन्त्री नरेन्द्र मोदीसंग भेटवार्ता भएको र नेपालका प्रधानमन्त्री केपी शर्मा ओलीको निमन्त्रणा सहितको सन्देश हस्तान्तरण गरिएको पनि उहाले जानकारी दिनुभयो ।
